THE VELVET CANDLES (Cataluña)
The Velvet Candles está considerada unha das mellores bandas estatais de doo-woop, estilo co que conseguiu cativar a miles de persoas. De feito, non só obtiveron o recoñecemento ao longo do territorio estatal, senón que, ademais, o fixeron a nivel internacional, con xiras por distintos países, incluída a súa participación no Hemsby Rock&Roll Weekender, o festival de referencia para o rock´n roll europeo.
A banda formouse no ano 2008, se ben todos os seus membros contan con sólidas traxectorias como integrantes de distintos grupos, coa curiosa coincidencia de que moitos deles utilizaban o nome de “Candles” nas súas respectivas anteriores formacións.
O feito de que The Velvet Candles incorpore banda instrumental aos seus directos dota de máis forza se cabe o espectáculo a capela. Fieis aos sons dos anos 50, nos seus shows combinan temas propios con grandes clásicos da época, o que converte as súas actuacións en grandes festas de excepcional calidade ante as que o público acaba rendido.